- 45 -

1386. April 14.

Nicolaus de Friberg canonicus Lubucensis et officialis Wratislaviensis discreto viro domino rectori ecclesie sancti Nicolai prope Ratibor salutem in domino. Nuper quandam definitivam sententiam pro parte venerabilis et religiosorum virorum abbatis et conventus monasterii in Ruda ordinis Cisterciensis contra carnifices ibidem in Ratibor inferius nominatim expressos in scriptis tulimus, qua mediante pronunciavimus decrevimus et declaravimus abbatem et conventum supradictos cum suis antecessoribus nomine dicti monasterii sui fuisse in possessione pacifica et quieta, censum octo marcarum in terminis infra scriptis, videlicet in dominica infra octavas Corporis Christi duas marcas, in festo beati Laurentii duas marcas, in festo beati Galli duas marcas et in festo Purificationis beate Marie Virginis gloriose ultimas duas marcas percipiendi tollendi et habendi in et a fartorio sive curia macellorum, nec non censu vulgariter Kutilczins dicto, ac ab ipsis carnificibus ipsorumque antecessoribus, ipsosque carnifices de anno domini 1384 abbatem et conventum et ipsorum monasterium supradictos possessione census huiusmodi in terminis prescriptis spoliasse et spoliare hodieque tenere spoliatos. Et ob hoc abbatem et conventum ac eorum monasterium antedictos ad possessionem pristinam dicti census restituendos et reintegrandos fore, quos etiam quantum in nobis fuit in Christi nomine restituimus et reintegramus. Et nihilominus eosdem carnifices videlicet Nicolaum Groschil, Joannem Flickebir magistros carnificum, Matthiam Kobuwiczer (etc. omnes ut supra in diplom. de a. 1385) et Thomam ad dationem prestationem et solutionem octo marcarum census persessi et solvere neglecti, necnon ad solutionem dicti census in antea annis singulis in solutionum terminis predictis abbati et conventui ac monasterio predictis una cum litis expensis ad novem marcas grossorum per nos previa moderatione pro tunc taxatis, condemnavimus faciendam. Nos igitur Nicolaus de Friberg canonicus Lubucensis et officialis Wratislaviensis prefatus ex parte abbatis et conventus ac monasterii predictorum debite requisitus, et ad executionem dicte nostre definitive sententie procedere volentes, vobis mandamus, quatenus predictos carnifices omnes et singulos supra nominatim expressos auctoritate nostra peremptorie moneatis, quos et nos monemus legitime per presentes, ut infra unum mensem continuum a vestra monitione ipsis facienda dictis abbati et conventui monasterii in Ruda de octo marcis grossorum census persessi nec non de litis expensis novem marcarum occasione eiusdem factis et per nos ad tantum previa moderatione taxatis, satis faciant integraliter et ex toto. Alioquin ex tunc omnes et singulos nominatim predictos excommunicamus dicta nostra definitiva sententia nec non iustitia exigentibus in his scriptis. Quos taliter excommunicatos semel ad minus in ipsorum ac demum in vestra ecclesiis singulis diebus dominicis publicetis donec dicte nostre definitive sententie cum effectu paruerint et a nobis fuerint absoluti. Datum Wratislavie die 14. mensis Aprilis anno domini 1386. Reddite literam sigillatam vestro appendenti sub sigillo.

Mitgetheilt von Herrn Dr. Potthast aus dem Diplomatar des Abtes Andreas Emanuel von 165 3.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 2, Urkunden der Klöster Rauden und Himmelwitz, der Dominicaner und Dominicanerinnen in der Stadt Ratibor. Hrsg von dr. W. Wattenbach, Breslau 1859.